«Бардаўская восень» шукае новыя імёны

Распачаўся прыём заявак на конкурсную праграму фэстывалю аўтарскай песьні «Бардаўская восень». Традыцыйна да ўдзелу запрашаюцца беларускамоўныя музыкі, старэйшыя за 18 гадоў. Заяўкі прымаюцца да 16 верасьня.

Свае акустычныя праграмы сольныя выканаўцы і гурты прадставяць на канцэртным праслухоўваньні ў Менску. Найлепшыя з выступоўцаў менскага адбору пазмагаюцца за Гран-пры ў Бельску-Падляскім у Польшчы — галоўнай фэстывальнай сцэне «Бардаўскай восені».

Арганізатары аднаго з найстарэйшых песенных конкурсаў беларускай сцэны не абмяжоўваюць канкурсантаў пэўнай стылістыкай. «У розныя гады на фэсьце перамагалі досыць не падобныя па стылі выканаўцы — ад прадстаўнікоў клясычнага бардаўскага стылю, такіх, як Зьміцер Вінаградаў, альбо мінулагоднія пераможцы — дуэт „Хмарка на траве“, да такіх гуртоў, як, напрыклад, Re1ikt. Свае спробы на адборы „Бардаўскай восені“ рабілі нават прадстаўнікі каляэлектроннай сцэны і рэп-выканаўцы, — камэнтуе Алесь Кот-Зайцаў. — Як каардынатар фэстывалю я найперш чакаю добрага якаснага ўзроўню ды новых цікавых імёнаў, незалежна ад стылю і спосабу выкананыя».

Для ўдзелу ў конкурсе неабходна даслаць запоўнены фармуляр на адрас vosien2016@gmail.com не пазьней за 16 верасьня. Адборачны канцэрт сёлетняга фэстывалю адбудзецца ў менскім клюбе ILI 18 верасьня ў 18:00. Апроч выступаў канкурсантаў, арганізатары абяцаюць выступы адмысловых гасьцей, імёны які пакуль трымаюцца ў сакрэце.

«Бардаўская восень» не зьмяняе сваім прынцыпам ужо больш за 20 гадоў, спалучаючы традыцыі бард-выканаўцаў з актуаліямі беларускай музыкі. На сцэне фэсту ў розныя гады выступалі Лявон Вольскі, Алег Хаменка, Кася Камоцкая, Зьміцер Вайцюшкевіч, Алесь Камоцкі, гралі гурты N.R.M., :B:N:, гучалі песьні з праекту «Народны альбом». Але галоўнай падзеяй фэстывалю штогод была і застаецца конкурсная праграма, мэта якой — адкрыць і падтрымаць новыя імёны беларускай аўтарскай песьні. Сярод мінулагодніх ляўрэатаў конкурсу — Паліна Рэспубліка, Яўген Барышнікаў, Аляксандр Ясінскі, гурты Re1ikt, «Нельга забыць» і іншыя.

Пытаньні адносна заявак і ўдзелу ў конкурсным адборы можна накіроўваць па адрасе vosien2016@gmail.com, альбо пакідаць ў суполках «Бардаўскай восені» ў Facebook.com ды Vk.com.