«Стары Ольса». Ад прадзедаў нам дастаўся рок-н-рол (аўдыё)

Яны ўздымаюць забытыя пласты старадаўняй музыкі, рэканструююць музычныя помнікі даўніх дзён, бяруцца за выкананьне рэлігійных гімнаў, а ў перапынках граюць Nirvana і Judas Priest на старажытных інструмэнтах. Гонар айчыннай музыкі — гурт «Стары Ольса» ў аўдыёчарце на Tuzin.fm.

Песьні ў выкананьні гурту «Стары Ольса» ўдзельнічалі ў чарце на «Тузіне Гітоў» практычна ад самага заснаваньня. 10 гадоў таму «Тузін» скарыла іх песьня «Ліцьвін», а пазьней «У карчме». Праз працяглы перапынак каманда на чале са Зьмітром Сасноўскім прадстаўляе ў гіт-парад твор «Ave Maria» з свайго апошняга альбому «Santa Maria», які акурат цяпер лідзіруе ў альбомным чарце.

Дакладная назва сьпеву — «Ave Maria» («Cuncti simus concanentes»), альбо «Засьпявай Адзінай Панне». Гэта сярэднявечны хрысьціянскі гіт. Арыгінал музыкі і словаў зьмешчаны ў рукапісе 14 стагодзьдзя «Чырвоная кніга кляштара Мансэрат» («Llibre Vermell de Montserrat»). Згодна з камэнтаром укладальніка рукапісу гэтую песьню можна выконваць паломнікам, якія спыніліся ў манастыры і маюць жаданьне сьпяваць і танчыць. Яе мэлёдыя ўзьнёслая і запамінальная. Па-беларуску «Авэ Марыя» загучала ўпершыню якраз у выкананьні «Старога Ольсы», дзякуючы перакладу Зьмітра Сасноўскага. Цікава, што пасьля зьяўленьня гэтага твору, «ольсаў» сталі актыўна запрашаць з выступамі розныя рэлігійныя арганізацыі.

«Рэлігійных сьпеваў у нашым рэпэртуары ня так і шмат, як здаецца. „Засьпявай Адзінай Панне“ — адна з чатырох. Выконваем яшчэ „Гімн Багародзіцы“, „Псальм Манаршэ Вечнэму“ і „Маці Каралеву“», — кажа Зьміцер і заўважае, што пераклад, аранжыроўка і запіс «Авэ Марыі» атрымалася зрабіць на дзіва хутка і лёгка, у адрозьненьне ад некаторых іншых сьпеваў. «Мусіць неба дапамагло», — кажуць удзельнікі «Старога Ольсы».

Упершыню песьню выканалі падчас штогадовага Каляднага фэсту. Лютніст каманды Ільля Кубліцкі кажа, што з другога куплету людзі хутка падхапілі прыпеў і пад канец песьні ўжо сьпявала і танчыла ўся заля: «Тое ж самае адбылося на знакамітым літоўскім фэсьце „Kilkim Žaibu“, дзе мэталёвыя паганцы пад канец песьні ўверавалі!» — пасьміхаецца Ільля.

Дарэчы, музыкі з задавальненьнем граюць і песьні Deep Purple, Nirvana, Metallica, Judas Priest на старадаўніх інструмэнтах. Праўда пакуль толькі дзеля забавы. Зьміцер Сасноўскі кажа, што як ні дзіўна, рыфы гітарнай рок-музыкі вельмі ўдала кладуцца на старадаўнія інструмэнты, у першую чаргу язычковыя, як шалмеі, жалейкі і дуды. Так што невыпадкова музыку «ольсаў» і «Авэ Марыю» ў прыватнасьці называюць сярэднявечным рок-н-ролам.

Tuzin.fm

Стары Ольса — Ave Maria (музыка і словы народныя, пераклад на беларускую Зьмітра Сасноўскага). Зьмяшчаецца са згоды выканаўцы.

Засьпявай Адзінай Паньне,

Авэ Марыя!

Славу, гонар, шанаваньне,

Авэ Марыя!

Была Пані на самоце,

Калі завітаў анёл,

Габрыель у Божай цноце,

Да яе зь нябёс сышоў.

Засьпявай Адзінай Паньне,

Авэ Марыя!