Відэа месяца на Tuzin.fm: «Танчыць» ад ili-ili

Кліп аўтарства Ideas studio з зорнай камандай актораў беларускіх тэатраў стаў пераможцам 2-га туру відэа-чарту на «Тузіне».

Пра перамогу ў відэачарце на Tuzin.fm удзельнікі гурта ili-ili дазналіся ў першы дзень новага 2014 году. «Прыемна было, калі ледзьве разлупілі вочы раніцай 1-га студзеня, дазнацца пра перамогу!» — кажуць музыкі. «Танчыць» на два галасы апярэдзіў відэа Вінсэнта на песьню «Ні кроку назад», сабраўшы 225 галасоў. Кліп пайшоў угару пасьля таго, як адзін з удзельнікаў каманды Міхась Зуй заклікаў актыўна галасаваць за яго падчас прэзэнтацыі беларускамоўнага альбому каманды «list» у Re:Public. «Калі ўсе, хто знаходзіцца ў залі, аддасьць свой голас за нас, то мы будзем па-за канкурэнцыяй», — сказаў музыка. Падобна на тое, што частка публікі заахвоцілася.

«Для нас удзел у гіт-парадах і галасавалках — гэта не самамэта, але добрая магчымасьць,каб прыцягнуць увагу людзей да таго,што мы робім», — заўважаюць выканаўцы. Безумоўна, яны будуць толькі рады, калі кліп на іх песьню захавае статус-кво і ў студзені.

Цяпер гурт ушчыльную займаецца падрыхтоўкай да праекту «Музычны цэх», які ўяўляе зь сябе он-лайн маратон з удзелам 16 беларускіх гуртоў. ili-ili на правах гаспадароў будуць размаўляць з гасьцямі, частаваць іх кавай/гарбатай ды самі выйдуць на сцэну з сэтам найлепшых песень.

Tuzin.fm