Амплітуда сьмеласьці
4195 / 0
03.11.2015

Пётар Клюеў. Ёсьць шкала адна (прэм’ера)

У новым туры аўдыёчарту на Tuzin.fm праект Пятра Клюева і Ўладзімера Майсюка прадстаўляе песьню «Амплітуда сьмеласьці» на верш Рыгора Барадуліна, якая натхніла музыкаў на стварэньне праекту.

«Амплітуда сьмеласьці» — верш з аднайменнага зборніку народнага паэта Беларусі Рыгора Барадуліна, які выйшаў у 1983 годзе. Праз 30 гадоў ён трапіў у рукі да музыкі Пятра Клюева і натхніў яго на стварэньне музычнага праекту — напісалася музыка да гэтых словаў, а па выніку і за назву гурта былі ўзятыя гэтыя словы. «Тэкст вершу дужа мяне крануў і ўсхваляваў. Гэта прэтэнзія да сябе самога, на колькі хапае сьмеласьці на нейкія чыны, каб быць мацнейшым, лепшым, больш годным чалавекам, артыстам, грамадзянінам, — кажа Пётар. — Мы з хлопцамі хочам несьці ня толькі моцны сэнс ў тэкстах, але і сэнс у музыцы — музычны мэсэдж. Таму будзем мяшаць стылі, шукаць свой груў, рабіць, што адчуваем, будзем правяраць сваю амплітуду сьмеласьці».

Музычны праект «Amplituda Śmielaści» Пётар заклаў зь вядомым гітарыстам Уладзімерам Майсюком. Таксама ў склад каманды ўваходзяць басіст Алесь-Францішак Мышкевіч, гітарыст Павал Трыпуць і бубнач Аляксандар Старажук. Гурт дэбютаваў на сцэне на акцыі «Салідарныя зь Беларусьсю» ў Варшаве 2 кастрычніка 2015 году. Цяпер музыкі працуюць над новым матэрыялам і музычным відэа. Сачыць за навінамі праекту можна праз афіцыйную суполку ў Facebook.

Песьня «Амплітуда сьмеласьці» возьме ўдзел у 4-м туры аўдыёчарту на Tuzin.fm.

Cлухаць на Soundclod

Amplituda Śmielaści — Амплітуда сьмеласьці (музыка Пятра Клюева, словы Рыгора Барадуліна). Зьмяшчаецца са згоды выканаўцы.

Tuzin.fm, фота Charter97.org

Хоць для вока не відна,

У одапісу, ў мэлясе

Ёсьць свая шкала адна —

Амплітуда сьмеласьці.

 

Шэф — вялікі,

Ты — малы,

Твой аклад у цэласьці,

Ты пільнуесься шкалы

Амплітуды сьмеласьці!

 

Не хадзі па бітым шкле.

Да васковай сьпеласьці

Адхіляйся па шкале

Амплітуды сьмеласьці.

 

Думка дзёрзкая была,

Ды чаму ж сумелася?

Не пускае зноў шкала —

Амплітуда сьмеласьці!

 

Хочаш скразнякоў,

Сьвятла,

Пахвала прыелася, —

Вытры ўсю шкалу

Датла,

Набярыся сьмеласьці!