Вясна прыйшла
11359 / 0
20.03.2015

«Песьняры» гукаюць вясну (прэм’ера песьні!)

Беларускі дзяржаўны ансамбль «Песьняры» прэзэнтуе на Tuzin.fm сваю новую песьню «Вясна прыйшла», якая мае ўвайсьці ў новы альбом «Благаславі маці».

Новы твор «Песьняроў» мае назву «Вясна прыйшла» і зьяўляецца апрацоўкай вядомай народнай песьні «Благаславі, маці, вясну сустракаці». Музычны кіраўнік ансамбля Раман Козыраў пачуў арыгінальны сьпеў на кружэлцы фірмы «Мэлёдыя» — «Анталёгія народнай музыкі. Беларуская музыка», на якой сабраны аўтэнтычны матэрыял з фальклёрных экспэдыцыяў 1962—1986 гадоў: «Вельмі зацікавіла гэтая складанка, бо там багата цікавых запісаў як інструмэнтальных, так і вакальных. Адзін зь іх і натхніў нас на запіс новага твору», — распавядае аўтар апрацоўкі.

Менавіта радок з гэтае песьні дасьць назву новаму альбому ансамбля «Песьняры». У дыск «Благаславі маці» ўвойдзе выключна беларускамоўны матэрыял, над якім музыкі працавалі з восені 2014 году. Ужо ўсе трэкі запісаныя і знаходзяцца на стадыі зьвядзеньня. Непасрэдна перад рэлізам музыкі зьбіраюцца выкласьці ў сеціва яшчэ некалькі песень у фармаце сынглаў. «Мы імкнемся пакрысе пашырыць сваю аўдыторыю і станавіцца бліжэй ды больш зразумелымі моладзі. Не выракаючыся нашых каранёў, імкнемся арыентавацца на сучаснае гучаньне. Як у нас гэта выходзіць можна меркаваць па нашай новай кампазыцыі», — заўважае музычны кіраўнік «Песьняроў» і заклікае гукаць вясну разам.

Песьняры — Вясна прыйшла (музыка і словы народныя, апрацоўка Рамана Козырава). Зьмяшчаецца са згоды выканаўцы.

Tuzin.fm

Благаславі, маці, вясну сустракаці

А зялёны явар кудравы

Вясну сустракаці, лета заклікаці

А зялёны явар кудравы

Вясна прыйшла, красна прыйшла (3 р.)

А зялёны явар кудравы 

Вясна-красна на чым прыйшла

А зялёны явар кудравы

На чым прыйшла, на чым прыехала

А зялёны явар кудравы

Прыйдзе весна, прыйдзе красна (3 р.)

А зялёны явар кудравы