Апошняя песьня
4025 / 0
06.11.2014

Sciana: «Мы ў гульні» (аўдыё)

Гурт Sciana спраўляе 15-годзьдзе і заяўляе з гэтай нагоды, што мае намер працягваць гэты квэст. У аўдыёчарце стартуе іх «Апошняя песьня» — адна з ключавых рэчаў гурта і далёка не фінальная ў творчасьці.

«Апошнюю песьню» па-сутнасьці можна лічыць загалоўнай у сёлетнім дыску гурта, бо менавіта радком зь яе і названы рэліз. Вакаліст каманды Павал Прохараў сьпявае яе з вакалісткай гурта TerraKod Касяй Леванюк. Паша распавядае, што зьявіўся твор з сумнай нагоды: «Я не выдаляю з тэлефоннай кнігі нумары тых, каму ўжо ніколі не змагу патэлефанаваць. І нумароў такіх з кожным годам, на жаль, толькі большае. Гэтая песьня — рэфлексія з чарговай такой сумнай нагоды». Ягоны паплечнік, басіст каманды Андрусь Клімус разглядае твор такім чынам: «Паколькі тэкст тут атрымаўся даволі мэтафарычны, таму ў шырокім сэнсе тэма гэтая — пра час, што ўжо мінуў, пра страчаныя магчымасьці, пра падзеі, якія ўжо адбыліся, пра завершаныя падарожжы і тыя пражытыя імгненьні, што назаўжды застануцца ў тваёй вечнасьці». Музыкі кажуць, што агулам іх «Апошняя песьня» — гэта асэнсаваньне незваротнасьці часу і жыцьця. І паколькі жыцьцё працягваецца, гэтая песьня ня стане апошняй.

Гурт якраз рыхтуецца справіць сваё 15-годзьдзе і рыхтуе з гэтай нагоды вялікі канцэрт у Менску, які пройдзе пад эгідай праекту «Жывы Тузін». Сачыце за навінамі!

Sciana — Апошняя песьня (музыка і словы гурта). Зьмяшчаецца са згоды выканаўцы.

Там, дзе бясконцасьць горных вяршынь

Абдымаюць твае цэпэліны,

Ты пакліч яго пазаві —

Адказу няма, адказу няма.

 

Там, дзе сьляды мінулых падзей

Ужо не знайсьці на ранішнім сьнезе,

Там гучыць цяпер для цябе

Адно цішыня, адно цішыня.

 

Мы застанемся,

Колькі з нас

Працягне гэты квэст?

Мы застанемся,

І ў адказ

Ты спачуваеш мне.

Мутнае неба

І вада

Апошняй песьняй.

Мы застанемся.

Мы застанемся.

 

Зноў новы дзень бягучым радком

Нечаканых сумных навінаў.

Кожны год — нібы пад агнём,

Нібы на вайне, нібы на вайне.

 

І бессэнсоўныя тысячы слоў.

І ўжо позна прасіць прабачэньня.

Ты застаўся, нехта пайшоў.

А мы ў гульні, а мы ў гульні.