Скандал! Tonqixod адмовіўся ад кліпа на «Насыпаць горы» (відэа)
3298 / 1
04.04.2014

Скандал! Tonqixod адмовіўся ад кліпа на «Насыпаць горы» (відэа)

У выніку творчага непаразуменьня, гурт Tonqixod адмовіўся ад удзелу ва ўжо адзьнятым відэа на песьню «Насыпаць горы». Тым ня менш, ролік быў прэзэнтаваны ў сеціве. Tuzin.fm выслухаў меркаваньні бакоў.

Ролік на песьню «Насыпаць горы» быў прэзэнтаваны ў сеціве 1 красавіка. Да яго была зьмешчаная такая анатацыя: «Што патрэбна беларусам, каб адчуваць сябе сапраўднымі? Чаго нам не хапае? Ці можа гор?)». З уліку таго, што ў кліпе задзейнічаны ўдзельнікі Tonqixod, то цалкам лягічна было б лічыць яго першым афіцыйным кліпам адной з самых пэрспэктыўных камандаў на беларускай сцэне. Аднак, лідэр гурта Ўладзь Лянкевіч заявіў, што гурт наогул бы не хацеў распаўсюджваць гэтае відэа.

На просьбу Tuzin.fm Уладь патлумачыў сваю пазыцыю: «Задумваўся ролік разам з намі, але ўжо на першых стадыях прадумкі сцэнару, а потым і падчас здымак мы (гурт TonqiXod) і рэжысэрка пачалі рэзка разыходзіцца ў меркаваньнях. Пабачыўшы, што ўсё ідзе ня ў тым кірунку, мы спрабавалі неяк паўплываць на працэс, але, на жаль, выніку гэта не дало. Далей на стадыі мантажу мы таксама ўносілі прапановы, і зноў безвынікова. Аўтарам роліку не ставала часу і матывацыі на пераробку і гэтак далей».

Рэжысэрам відэа была Ўладлена Сянькова. На пытаньне ў чым была задума роліка Ўлада зазначыла: «Складана казаць пра тое, якая была задума. Я сьвята веру, што фільмы „чытаюць“ нас і ня бачу сэнсу рабіць гэта наадварот. Пры стварэньні гэтага кліпа мы перадусім кіраваліся ідэямі антыўтопіі і намагаліся стварыць свой „2984“. Наконт разыходжаньняў мне не хацелася б казаць, бо мне здаецца, што закадравы працэс мусіць заставацца за кадрам».

Сама Ўлада не распаўсюджвала відэа «праз павагу да музыкаў». Тым ня менш, яно зьявілася ў сеціве. Рашэньне прымаў прадусар роліка Леанід Каліценя: «У нас сапраўды былі разыходжаньні з мастацкага пункту гледжаньня. І мы вырышылі разыйсьціся на ўмовах, што ня будзем прадстаўляць гэта, як кліп гурта Tonqixod. Таму відэа распаўсюджваецца, як ролік кампаніі „Грамадзянскасьць.BY“. Няможна класьці ў шуфляду добрую, як на мой погляд, працу».

TonqiXod да гэтага роліка ставіцца так: «Цяпер у інтэрнэце ёсьць аўтарскае відэа, дзе скарыстана нашая музыка. Так мы гэта для сябе вызначаем. Шкада толькі, што ў некаторых героях відэа чытаюцца нашы рысы твару», — кажа Ўладзь Лянкевіч.

Тым, каму цікавы ўласна погляд гурта TonqiXod на магчымы відэашэраг для песьні «Насыпаць горы», музыкі прапануюць паглядзець іншы ролік, змантаваны з фрагмэнтаў экспэрымэнтальнага фільму «Навесьні» рэжысэра Міхаіла Каўфмана (1929). Менавіта гэты шэраг суправаджае кампазыцыю на жывых выступах каманды.

Сяргей Будкін, Tuzin.fm

КАМЕНТАРЫ:

  • Searhei Budkin
    Searhei Budkin / адказаць
    04.04.2014 / 16:29

    Годны мог быць кліп! Вельмі шкада, што выдатную задуму не ўвасобілі да канца.

  • КАМЕНТАВАЦЬ