Топ-12 прэм’ераў зімы-2019 (аўдыё)
811 / 0
06.03.2019

Топ-12 прэм’ераў зімы-2019 (аўдыё)

Stokes, «Цмокі», Volski, Uzari, Akute, Dzieciuki… У новым аглядзе беларускамоўных прэм’ераў на TuzinFM – дэбюты ад маладых выканаўцаў і сьвежыя гіты ад знакавых гуртоў.

Stokes – Пад дажджом

Новы трэк, з дапамогай якога наваполацка-менска-маскоўскі гурт нагадвае пра сваё існаваньне. У багатай на падзеі 22-гадовай гісторыі гурта гэта другі беларускамоўны аўтарскі трэк. І ізноў ягоным суаўтарам выступіў Глеб Лабадзенка, які пераклаў калісьці «Пад купалам нябёс». Болей пра трэк.

Цмокі – Я хацеў бы спаткацца з Вамі на вуліцы

Новы твор гурта, у якім граюць рэдактары Citydog і NN.by. «Гэта свабодны верш, які вельмі лёгка кладзецца на музыку, таму што ў ім – Космас. Спадзяемся, што адчуваньне гэтага Космасу мы перадалі і ў нашай песьні», – кажа вакаліст гурта Мікола Шакель. Музыкі таксама прэзэнтавалі атмасфэрны відэашэраг з фота беларускага астранома Віктара Малышчыца. Болей пра трэк

Uzari – Падзяка сэрца

Новы беларускамоўны трэк ад колішняга прадстаўніка Беларусі на «Эўравізіі», у якім ён аддае даніну павагі сваёй краіне, мове і гісторыі. Гэты самотнік анансуе будучы альбом сьпевака, які будзе цалкам беларускамоўным. Ягоны рэліз заплянаваны на красавік 2019-га. Болей пра трэк.

Volski – Лепшыя на сьвеце

Песьня, якую сам Лявон называе адной з самых аптымістычных на сваім альбоме «Гравітацыя». «Яна пра каханьне. Такое яскравае і сьветлае, быццам ляціш над зямлёй», – зазначае аўтар. Рэжысэр Арцём Лобач зрабіў да гэтай песьні сюрэалістычны відэашэраг з рарытэтнымі кадрамі старога Менску.

Гарадскі вал – Серабранка

Новы самотнік гурта Рамана Абрамчука выйшаў праз пару тыдняў пасьля папярэдняга «Адмарозкам, Даўнам, Закаханым». У яго ўвайшлі таксама два трэкі і абодва напісаныя на словы Антона Рудака. Выканаўца так прадстаўляе загалоўны трэк: «Сабака Элвіс асьвятляе шлях бадзёрым бітам-брэхам, беспантовыя панэльнікі становяцца парталам у касьмічны абсяг, сябрукі-балбесы адпраўляюць галоўнага героя ў Амэрыку на арэлях, а саксафаніст перадае прывітаньне маме на 48-й сэкундзе!». Другі нумар – новая вэрсія вядомай ужо песьні «Элвіс». Сярод музыкаў, якія былі задзейнічаны ў запісе трэка Дзяніс Жураўлёў aka Груша (біт-бокс), Уладзь Пыльчанка (акардэон) і Фрыд Самотны (саксафон). 

Дом Сувязі – Дзед Барадзед

Песьня з дэбютнага EP менскага поп-панк гурту прасякнутая настальгіяй па дзяцінству. «Гэта ода беларускаму тэлебачаньню, якое сканала, а тады цешыла аўтарскімі праектамі і харызматычнымі вядоўцамі. Галоўных герояў трэка памятаюць усе з пакаленьня 90-х. Іх можна выкінуць на сьметніцу, але немагчыма выкрасьліць з нашых сэрцаў», – так прэзэнтавалі свой трэк пра Дзеда Барадзеда музыкі.

Akute – Кома Intro (feat. Грязь)

Самотнік, які анансуе пяты альбом магілёўскага гурта. Трэк атрымаўся  нетыповым, зрэшты такім непрадказальным мусіць быць увесь будучы рэліз. «Галоўная ідэя песьні ў тым, што выйсьці са стану комы можна не ў той бок», – кажа яе суаўтар Раман Жыгараў. Музыкі запісалі твор у калябарацыі са сваім даўнім сябрам Дзянісам Астапавым з праекту «Грязь». Гэта ня першая сумесная праца – некалі яны прэзэнтавалі на TuzinFM трэк «Сьпі», у стварэньні якога паўдзельнічаў другі заснавальнік «Грязи» – Рома Англічанін.

Mandzik feat. Lear Dyska

Першы сынгл з будучага дэбютнага рэлізу «Tancy» паказаў малады рэпэр і кіраўнік «Моладзі БНФ» Дзяніс Мандзік. Трэк запісаны разам з маладой сьпявачкай Валерыяй Суравіцкай (Lear).  Выканаўца кажа, што ягоны музычны праект накіраваны на захаваньне і ўзьмацненьне беларускамоўнага гіп-гопу. Літаральна сьледам выйшаў яшчэ адзін фіт з удзелам Мандзіка. Разам з рэпэрам Zło яны пакпілі зь беларускіх чыноўнікаў.

Kawa – Бам-бам

Гомельскі электра-поп гурт на чале са сьпявачкаю Таісіяй Серыкавай выдаў другі беларускамоўны самотнік «Бам-бам». Да гэтага музыкі запісалі трэк «Патанцуем разам» ды кліп на яго. Слухачы прынялі песьню вельмі прыязна, таму Таісія вырашыла працягнуць. «Гэта песьня пра летні настрой, пра дыханьне і закаханасьць. Няхай лета будзе з вамі цэлы год!», – так прэзэнтуе твор аўтарка.

VectorEgo – Сьвет

Поп-рок гурт зь Менску прымеркаваў выхад свайго першага беларускамоўнага самотніка да дня ўсіх закаханых. Такім чынам музыкі вырашылі зрабіць тэматычнае віншаваньне сваім прыхільнікам. Песьню сустрэлі прыязна, а гэта значыць, што можа быць працяг. Аўтарам словаў і музыкі да «Сьвета» выступіў Аляксандар Сычоў, ён жа зрабіў аранжыроўку, прапісаў гітару і бубны ды цалкам запісаў ды зьвёў сам трэк. А засьпявала вакалістка гурта Алена Магілёўская.

Alex Nail feat. Yamit – Zamova

Вынік экспэрымэнту ды-джэя і фолькавай сьпявачкі, які паўстаў з ідэі спалучыць этніку з сучаснай музыкай і стварыць арыгінальны трэк, якога яшчэ не было ў беларускай музыцы. «Экспэрымэнтаў па спалучэньню беларускага фольку з трансавай музыкай, хаўсам ды іншымі электроннымі стылямі было мноства, але мы знайшлі пэўную нішу ў стылі трэп, у якім яшчэ ніхто не экспэрымэнтаваў такім чынам», – зазначыў у камэнтары да TuzinFM Alex Nail.  Вакальную партыю запісала Марына Яміт, салістка гурта Rutvica.

DzieciukiКалі над лугам бусел праляцеў

Першая песьня з новага альбому «Радыё «Harodnia», якую гарадзенскія музыкі паказалі сваім прыхільнікам. Яна напісаная на верш Алеся Чобата, упершыню ў акустычнай вэрсіі Алесь Дзянісаў яе прэзэнтаваў перад Днём Волі-2017. І менавіта тую праграму на словы паэта са Скідзелю менскія ідэолягі забаранілі да выкананьня. «У гэтым простым, на першы погляд вершы нiбыта схавалася адначасова ўсё хараство, уся боль i сутнасьць беларусаў. Гэтая песьня стала для нас усix гэткай кропкай незвароту, у якой кожны з нас, пакiнуў частку сваёй душы», – заявілі Dzieciuki з нагоды прэзэнтацыі электрычнай вэрсіі. Песьня таксама пабачыла сьвет у піяна-вэрсіі, якую зрабіла Вераніка Крупіца.

Паслухаць прэм’еры песень беларускіх выканаўцаў можна ў аўтарскай праграме кіраўніка TuzinFM Сяргея Будкіна «Музыка тыдня» на «Беларускім Радыё Рацыя» (98,1 FM у Беластоку і Гародні, 99,2 FM у Берасьці, он-лайн — www.racyja.com) штотыдня ў аўторак у 20:05 з паўторам у нядзелю ў 11:05 (па беларускім часе).

ТОП-12 ПРЭМЕРАЎ ВОСЕНІ-ЗІМЫ 2018/2019. ROCK/INDIE/RAP

ТОП-12 ПРЭМ’ЕРАЎ ВОСЕНІ-ЗІМЫ 2018/2019. ELECTRO/POP/FOLK

Увага музыкам! Калі пра вашую прэм’еру не згадалі ў нашых аглядах, магчыма вы забыліся паведаміць пра яе існаваньне нам на мэйл 12tuzin@gmail.com. Дасылайце свае трэкі, інфармацыю пра трэк/кліп/рэліз ды фота. Перавагу аддаём песьням на беларускай мове. Пра новыя цікавыя беларускія трэкі таксама можна паведамляць у камэнтарах да гэтага матэрыялу.

TuzinFM