«Своеасаблівасьць не выключае цытаваньня, а самаіронія — важных рэчаў»
2178 / 1
12.07.2016

«Своеасаблівасьць не выключае цытаваньня, а самаіронія — важных рэчаў»

Філёзаф Вольга Шпарага назвала свой топ-12 песень па выніку музычнага сэзону 2015—2016 на Tuzin.fm і паразважала пра парадоксы ў беларускай музыцы.

Мне падабаецца своеасаблівасьць, якая не выключае цытаваньня, але пры гэтым перамагае. Але ж цікава ня толькі гэта — цікавыя таксама парадоксы. Калі пра сьмеласьць на словы Рыгора Барадуліна гучыць музыка ў стылі дыска. Гэта вядзе да іншага вымярэньня абраных мною твораў — пераважная большасьць зь іх самаіранічныя (і спалучэньне дыска са сьмеласьцю і Барадуліным я ўспрымаю таксама як праяву самаіроніі). Але ж гэта самаіронія не выключае важных рэчаў, напрыклад, пытаньня: «А што мы скажам дзецям?». Наадварот, яна дапамагае іх сфармуляваць.

Мне падабаецца, калі ў песьнях узгадваецца нашае грамадзтва, альбо нейкія праблемы, але пры гэтым мы чуем паэтычны голас, які выконвае ролю пасярэдніка. Такім чынам успрыняла я песьні «Сьвечкі» і «Mova». Першая наўпрост вельмі мілагучная і пры гэтым спалучае два зусім розныя настроі, і тэма злачынцаў і ахвяраў у вершы Анатоля Сыса атрымліваецца такім чынам сфармуляванай вельмі далікатна і адначасова нібыта з надзеяй на разуменьне яе значнасьці іншымі. У выпадку ж «Мовы» мы маем супрацьлеглую сытуацыю, калі пытаньне ці праблема фармулюецца музычнымі сродкамі вельмі ляканічна і рытмічна.

«Марозная» і «Лося» здаюцца мне парадаксальнымі яшчэ ў адным сэнсе — яны дазваляюць спалучыць сучасную цьвярозасьць з трывожнымі галасамі альбо прывідамі мінулага. З гэтым спалучэньнем, на мой погляд, мы сутыкаемся ў нашым штодзённым жыцьці вельмі часта, і музычныя творы ў гэтым сэнсе дапамагаюць нам з рэфлексіяй на гэты конт.

Палову абраных мною песень я бы таксама аднесла да аптымістычных, альбо да жыцьцесьцьвярджальных, але пры гэтым не банальных яны не пра першае каханьне, але пра стасункі; яны заклікаюць радавацца, але распавядаюць і пра зьнікненьне і канец. Маю на ўвазе творы гуртоў Teleport, BosaeSonca, TonqiXod, Sounduk. Такіх песень мне таксама не хапае ў нашым лякальным кантэксьце. Таксама ўключыла ў свой сьпіс «Будзь сьмелым» гурта Brutto, але кавэр на іх ад маладога гурта Cas Lajna «Будзь трусам» мне больш падабаецца.

 Усе абраныя песьні я слухала па некалькі разоў, і гатовая слухаць яшчэ і яшчэ пад розныя настроі. 

1.     Ilo&friends — Сьвечкі

2.     Intelligency — Mova

3.     Sounduk — Давай сьмяяцца

4.     Teleport — Leta

5.     BosaeSonca і Ганна Хітрык — Фаервэркамі

6.     TonqiXod — Камняпад

7.     TonqiХod і Сяргей Пукст — Марозная

8.     Shuma — Лося

9.     Амплітуда сьмеласьці — Амплітуда сьмеласьці

10.  U.G.oslavia — Маладосьць

11.  Trubetskoy і Аляксандар Памідораў — Цуд на Каляды

12.  Brutto — Будзь сьмелым

Вольга Шпарага, для Tuzin.fm

Вольга Шпарага – філёзаф, кандыдат філязофскіх навук, рэдактарка інтэрнэт-часопіса «Новая Еўропа», супрацоўніца Цэнтра эўрапейскіх дасьледаваньняў (Менск). Аўтарка манаграфіі «Пробуждение политической жизни: Эссе о философии публичности» (Вільня: ЕГУ, 2010), навуковая (су)рэдактарка і ўкладальніца пяці калектыўных манаграфій. Сфэра інтарэсаў: фэнамэналёгія і палітычная філязофія, эўрапейская прастора і месца Беларусі ў ёй, сучаснае мастацтва. Кіраўніца канцэнтрацыі «Сучаснае грамадзтва, этыка і палітыка».

КАМЕНТАРЫ: